阿蘇效率球壇之最

上季玩完馬後炮，今季就做預言家，同大家一齊睇吓嚟緊周末有咩好睇。本周傾咩：蘇亞雷斯拍唔拍得住美斯同C朗？

喺𠵱幾年球壇，美斯同基斯坦奴朗拿度（C朗）公認係頭兩號人物，但邊個可以入選三甲，同佢兩個並列？小弟認為蘇亞雷斯有𠵱個能力。
C朗今季西甲199腳射門入28球，美斯就125次起腳入23球，阿蘇喺英超153次射門入29球，無論計入球量或者射門效率，阿蘇今季都略勝兩位球王。助攻方面，C朗8次，美斯10次，而阿蘇11次，又係稍為領先。齋睇數據，阿蘇絕對有同美斯、C朗睇齊嘅能力。
阿蘇同佢兩位一樣，擁有帶起成隊波嘅能力。計球員質素，比起車路士同曼城，利記真係差啲，但阿蘇一個帶起，唔止幫球隊衝上前4，𠵱家仲係爭標分子。阿蘇踢法全面，除咗入波，仲識用走位同傳球教隊友踢波，組織進攻，有時更會返後防守，係隊友嘅榜樣。喺佢薰陶下，史杜列治由「史獨」變成一位把握力高嘅射手，史達寧、佐敦軒達臣亦越踢越好。喺謝拉特後移之下，阿蘇已經成為利物浦實質嘅領袖。
可能有人話蘇亞雷斯國家隊成績一般，但C朗同美斯喺國家隊又有咩表現呢？喺能力上，阿蘇無疑拍得住佢兩位，𠵱家只係差時間去證明。阿蘇舊年正式爆發，但上季尾咬人被罰停賽，搞到佢冇得挑戰尹佩斯嘅英超神射手；加埋今季，佢都已經爆咗兩季。只要阿蘇下季帶利物浦踢歐聯時，都有𠵱家嘅發揮，相信會有更多人認同阿蘇有能力同兩大球王拗手瓜。

[img]http://static.apple.nextmedia.com/images/apple-photos/apple/20140404/large/aa0703a.jpg[/img]
■蘇亞雷斯今季入球效率驚人。資料圖片

來源:蘋果日報網站