第400次披巴塞戰衣 美斯變助攻王

巴塞隆拿喺周三西班牙盃8強首回合賽事作客4:1反勝利雲特，對球王美斯嚟講別具意義，因為呢場波係佢第400場代表巴塞上陣嘅比賽。喺呢個里程碑美斯一於唔以入波嚟為自己贈興，反而嚟個助攻帽子戲法，3次造就小將基斯甸泰路建功，一樣咁威水。
巴塞同利雲特啱啱先喺周日西甲碰過頭，當時巴塞同樣喺作客情況下，只以1:1逼和對手失分。3日後喺同一場地再交手，場合變咗係西班牙盃，利雲特一樣係先開紀錄一隊，由艾沙亞喺31分鐘建功領先上半場。易邊後巴塞大反擊，對手一次蝦碌解圍由桑法蘭擺烏龍，令巴塞喺53分鐘扳平。之後已經係巴塞嘅世界，22歲小將基斯甸泰路分別喺60、81同埋86分鐘連入3球，而交波畀佢嘅，全部都係美斯。

[b]雲格親臨睇實泰路[/b]
自04/05球季出道，美斯喺近10年剛為巴塞上陣400場波，贏咗278場，入331球攞到21個冠軍，絕對係神級嘅表現。有趣嘅係美斯之後代表巴塞第100、200同300次上陣呢3場比賽，咁啱都係冇入球。雖然今場波延續呢個走勢，但表現一樣咁精采，係佢職業生涯第一次做到助攻帽子戲法。
美斯喺賽後話：「今場波一啲都唔易踢，喺上半場落後，好在最後都有理想嘅賽果。喺未來半年對我嚟講，要為巴塞同阿根廷國家隊爭取好成績，我會一路充滿鬥志。」阿仙奴領隊雲格都係呢場波嘅座上客，據講佢就係專程嚟睇泰路嘅表現，如果係真咁佢就多得美斯唔少，泰路入3球之後恐怕身價點都會升番多少，想巴塞放人肯定唔容易。

[b]傳羅素辭任巴塞會長[/b]
另外，巴塞隆拿禮拜四召開特別大會，外界估計係會長羅素辭職。由於西班牙最高法院就尼馬由山度士轉會巴塞有冇誤用資金一事同意展開聆訊，矛頭直指向羅素。消息指羅素為免巴塞要上身，決定將責任攬晒上身。


[img]http://static.apple.nextmedia.com/images/apple-photos/video/20140124/org/1390508337_74fa.jpg[/img]


來源:蘋果日報網站