巴利輸波　美斯傷出　左腳王遭殃

[img]http://static.apple.nextmedia.com/images/apple-photos/video/20130930/org/1380484178_b225.jpg[/img]

加里夫巴利隻「黃金左腳」貴絕全球，上季幫熱刺拎唔少救命分，點知佢上周六首度喺皇馬主場出師，就救唔到銀河艦隊，打吡戰竟然失威畀馬德里體育會。同日「左腳球王」美斯雖然幫巴塞取得7連勝，但就整傷大腿肌肉，會方公佈佢要休息2至3星期，唔使預佢周二對些路迪嘅歐聯分組賽。
皇馬上周六主場出擊，同馬體會合演首都打吡，雙方近23次聯賽交鋒，皇馬取得16勝7和，教練安察洛堤（肥安）心諗夠殺，1億歐元轉會費嘅巴利始終有傷患纏身，今仗只做後備。點知皇馬11分鐘解圍失誤，俾客軍截到順勢打反擊，近期弗到漏嘅前鋒迪亞高哥斯達單刀建功，幫客軍射成1:0。


[img]http://static.apple.nextmedia.com/images/apple-photos/apple/20130930/large/30s5-106p.jpg[/img]
■加里夫巴利（右）首度於主場出師，皇馬卻在首都打吡戰失威。美聯社

[img]http://static.apple.nextmedia.com/images/apple-photos/apple/20130930/large/30s5-107p.jpg[/img]
■馬體會雖有法卡奧離隊，不過前鋒迪亞高哥斯達（右）成功上位，已累積8個聯賽入球。路透社

[b]馬體會開季7連勝[/b]
肥安下半場即刻派巴利上陣，巴利亦首度喺巴拿比奴球場落場，仲司職右翼鋒；其實擅長左腳嘅巴利，上季喺熱刺都不時串演右翼，推埋大位勁射呢招，仲幫球隊拎到唔少救命3分，但今次如意算盤打唔響，兩次射門1次中目標，但就畀馬體會門將泰拔高圖爾斯救出，加上C朗、艾華路莫拉達等連番失機，皇馬未能追和，以0:1見負，今季不敗身被打破，亦都係1999年以嚟，首次主場輸畀馬體會。皇馬教練出名難撈，賽後主隊球迷發出大量噓聲，肥安就話：「呢兩場我哋都打得唔好，唔夠專注，一定要改善，𠵱家差巴塞同馬體會5分，好彩聯賽仲有好長嘅路。」


[img]http://static.apple.nextmedia.com/images/apple-photos/apple/20130930/large/30s5-105p.jpg[/img]
■巴塞隆拿開季7連勝，但美中不足是先開紀錄的美斯（右）大腿受傷退下火線。路透社

馬體會開季就威水，殺低皇馬取得7連勝，同佢一齊咁威，就有巴塞；巴塞上周六作客艾美利亞，由美斯同艾迪安奴各建一功，以2:0贏波，創球會紀錄開季7連勝。不過「左腳球王」美斯踢到28分鐘，因為左腳大腿肌肉受傷退下火線，由沙維入替。球會就係官方網頁表示，隊醫周日為美斯作詳細檢查，確定需缺陣2至3星期，周二作客些路迪嘅歐聯就肯定缺陣。美斯今季已經喺各項比賽幫巴塞入11球，睇嚟巴西前鋒尼馬要孭重飛嘞。


來源:蘋果日報網站