輸波兼卸膊　黑貓怒炒狂人

[img]http://static.apple.nextmedia.com/images/apple-photos/video/20130924/org/1379965636_85db.jpg[/img]

今季英超第一位冇得撈嘅領隊好快喺未夠10月就出現，到𠵱家唯一一支仲未開齋嘅包尾球隊新特蘭，球會喺周日宣佈辭退迪肯尼奧。意大利狂人上季尾接手，帶領黑貓成功護級後意氣風發，冇將一班舊臣放喺眼內；今季又簽成14個新兵，多到唔知佢自己認唔認得晒，加上學人講紀律偏偏嚴人寬己，周身牙齒印想撈得耐都難。

[img]http://static.apple.nextmedia.com/images/apple-photos/apple/20130924/large/img0000012_aa03.gif[/img]

[img]http://static.apple.nextmedia.com/images/apple-photos/apple/20130924/large/24s3-541p.jpg[/img]
■迪肯尼奧（左二）聲大大，不過建樹其實唔係多。資料圖片

[b]狂簽14新兵成催命符[/b]
狂人喺今年3月尾先上任，佢喺3:0作客大勝紐卡素嗰場，激情四射嘅表現真係令我求大俠到𠵱家仲印象深刻。不過新特蘭當時剩返7場聯賽，其實只係贏到兩場，但最後總算成功護級。迪肯尼奧一向鐵腕，要球員遵守一大堆規條，又周時公開批評陣中球員呢樣唔好嗰樣唔掂，其中上季球隊隊長卡達莫同守將巴士利都係佢重點打壓對象。據講佢曾經同某位前主力鬧交，後者揚言話：「我喺度一定留得耐過你。」點知真係講中。
相信大家仲記得新特蘭喺今夏嚟過香港踢英超挑戰盃，嗰陣迪肯尼奧講得漂亮，話班波係嚟踢熱身賽備戰新季，唔可以有度假心態，所以就禁止球員出外購物；點知好衰唔衰佢自己就俾人影到去濕平買錶，又走去銅鑼灣影高達，班球員點會順超。

[b]迪馬堤奧接任大熱[/b]
狂人當正自己係救世主，留得喺英超後大事擴軍，連埋借將一共簽咗14個新兵，其中唔少到佢執包袱嗰日都未喺英超亮過相（見附表）。就算有得出嗰啲表現亦唔見得好，前鋒艾迪杜里同波連尼仲未開齋。球隊變動咁大絕對唔係好事，加上咁做又一定會令一班原有球員唔高興，覺得自己冇位企就要反抗。
講到尾，有成績交到出嚟就幾惡都得，但係新特蘭一路冇起色，狂人領軍下新特蘭喺英超跨季12場波都仲係贏得兩場；另一導火線係迪肯尼奧卸得就卸，將責任推晒去球員度，據講日前同班球員喺更衣室炒大鑊，最後球會決定撐球員唔撐佢。佢同胞迪馬堤奧暫時成為接任大熱，其他熱門人選仲有普耶同埋麥利殊。


來源:蘋果日報網站