冰鎮馬達　摩佬寸得起

[img]http://static.apple.nextmedia.com/images/apple-photos/video/20130923/org/1379879797_0876.jpg[/img]

車路士之前接連喺英超同歐聯輸波，主帥摩連奴一下子承受好大壓力，最大矛頭係話佢一直唔重用上季藍戰車嘅「摩打」桑馬達。摩帥一向最鍾意拗頸，你想我出我就偏唔出，上周六英超迎富咸，桑馬達連後備都冇，結果車仔喺主場以2:0擊敗對手；摩連奴賽後自然囂爆，話用唔用馬達佢自有分數，叫班塘邊鶴唔好咁多聲氣。
老實講呢場波真係悶悶哋，車路士主場出擊，靠摩佬好重用嘅奧斯卡杜斯山度士同埋約翰米基爾，喺下半場各建一功以2:0取勝，總算喺連續4場波贏唔到之後重上勝軌，為自己減減壓。
贏到波摩連奴自然風騷，佢喺賽後話：「今日嘅賽果當然比上星期輸畀愛華頓嗰場好，但論表現其實上場係好啲。講到尾贏波先至最緊要，上場輸波之後，幾乎全世界人都走嚟同我講，呢個係車路士超過10年以來嘅最差開局；但係大家睇吓喺呢場波之後，積分榜仲有邊隊排喺我哋前面？」
桑馬達喺上周三歐聯只係後備入替，隨即引起列納同古列治等名宿公開指摘摩連奴唔應該唔用佢。到上周六場聯賽，馬達加埋大衛雷斯直情連後備都冇，摩帥就回應：「我知道好多人都好鍾意馬達，覺得佢應該正選上陣。其實我都想安排佢同埋奧斯卡一齊正選，但馬達都要先做啲改變同調整。」

[b]揶揄古列治識講唔識教[/b]
轉頭仲順便寸埋一班多多意見嘅名宿：「人係有言論自由，不過我先係車路士領隊，而唔係列納，我哋已經有屬於自己嘅一套足球理念，之前亦靠佢嚟贏過冠軍，所以冇打算改變太多。英格蘭有好多出色嘅球評家，不過領隊工作係困難過講波佬好多，我會尊重佢哋，但我仍然會做好自己嘅工作。古列治係非一般嘅球評家，因為佢曾經做過領隊，但我估佢唔會為佢自己喺領隊工作嘅成就有任何自豪囉！」

[img]http://static.apple.nextmedia.com/images/apple-photos/apple/20130923/large/img0000012_aa02.gif[/img]


來源:蘋果日報網站