羅馬里奧爆美斯自閉

巴塞隆拿嘅阿根廷前鋒美斯，又好波又唔爛蒲爛滾，喺足球壇簡直就係萬中無一；不過前巴塞射手羅馬里奧就爆料，指美斯好抗拒陌生人，係因為有輕度自閉症，不過因禍得福，專注踢波而成為一代巨星。

前巴西同巴塞射手羅馬里奧，日前就喺個人Twitter爆料：「朋友們，你知道美斯患有亞斯伯格症候群（Asperger syndrome）嗎？呢個係一種輕微自閉症，但呢個症會令人更專注自己嘅事情。」羅馬里奧仲醫生上身，放埋條link介紹呢個病，仲話牛頓、愛因斯坦兩大科學家，都係有呢個症，而美斯亦都已經克服咗，仲喺球場上發光發熱㖭。

[img]http://static.apple.nextmedia.com/images/apple-photos/apple/20130911/large/img0000012_aa3.gif[/img]

[b]有社交障礙做事專注[/b]
其實患亞斯伯格症候群原因不名，可能係遺傳，或者母親懷孕期間出問題，但患者唔會有好大問題，主要都係有社交障礙，唔願同陌生人交往等等，咁睇嚟同美斯性格都好似，美斯出名係宅男，冇波踢日子，通常留喺屋企同家人玩或者打機。
從好方面講，患亞斯伯格症候群會令人更專注有興趣事件上，唔會分心其他嘢，其他患有亞斯伯格症候群嘅名人，好似牛頓、愛因斯坦、莫札特、貝多芬、安徒生等，都各有超卓成就。不過羅馬里奧離開巴塞多年，同美斯冇咩關係，當事人亦未有肯定呢單嘢，可信性就有啲質疑。
點都好，美斯今時今日已經係巴塞同阿根廷不可或缺嘅球星；阿根廷周二作客巴拉圭贏波，就可以出線明年世界盃決賽周，巴塞已經幫美斯請定假，如果阿根廷順利出線，就唔好徵召美斯踢10月餘下兩場外圍賽，事關嗰排巴塞先喺歐聯鬥AC米蘭，又要喺聯賽鬥皇馬，希望幫美斯爭取更多休息時間。

[img]http://static.apple.nextmedia.com/images/apple-photos/apple/20130911/large/11s3-904p.jpg[/img]
■巴塞繼續獲中東財團支持，周一落實與阿拉伯聯合銀行簽訂贊助合約。

[b]尼馬靠神奇飲品增磅[/b]
除咗美斯，巴塞另一箭頭尼馬都身體有毛病，加盟之前巴塞已發現佢有貧血，搞到體重低於常人；為咗解決呢個問題，巴塞營養師吩咐尼馬平時多食菠菜、魚肉等，補充鐵質外，仲配製「神奇飲品」，含有豐富維他命、蛋白質等，要求尼馬練波、比賽前後飲用，據報尼馬經過一系列治療，已經重咗4公斤。
另外，巴塞繼續獲中東資金支持，球會宣佈同阿拉伯聯合銀行（UAB）簽訂為期3年嘅贊助合約，但官方未有公佈具體贊助額。



來源:蘋果日報網站